ميزان الحسنات والسيئات، أو ما يسميه البعض ميزان الأعمال الحسنة والسيئة، أو غيرها من المسميات!
طيب هو ايه ده الأول؟
عبارة عن تطبيق في شكل نشاط (ميزان بكفتين لوزن الأعمال الحسنة والسيئة للطفل على مدار اليوم وفي نهاية اليوم يتم تقييم أعمال الطفل ويتحسب له أيهما أكبر).
ومن نتيجة بحثي للناس اللي طبقت النشاط، الطفل إذا أعماله حسنة/إيجابية/حلوة وشطور يكافئ عليها، أما اذا أعماله سيئة/سلبية/مسمعش الكلام فـ يا ويله بقى فيه عقوبات وحرمان وغيرها.
طيب تعالوا نشوف الأول ليه بعض الأمهات والمعلمات جت لهم الفكرة دي وحاولوا يطبقوها؟
عشان عايزين يقوموا سلوك أطفالهم ويحفزوا السلوك الإيجابي عندهم، وعشان يسمعوا الكلام ونحط تحتها خطوط كتيييير.
حلو الكلام؟
لا مش حلو، ليه؟
لأن الموضوع فيه بعض المشاكل سواء من الناحية الدينية أو التربوية.
ازاي؟ كملي معايا المقال وهتعرفي ...
بما أننا في رمضان، فبقالي سنتين أو أكتر في الفترة دي ألاقي جروبات وأماكن غيرها بتنشر الفكرة دي.
والأمهات للأسف بتنبهر بيه (خاصة الفكرة متاخده من جانب ديني ألا وهو الميزان) وعليها شوية إضافات عشان تكون تربوية
يعني 2*1.
المهم، ندخل في المشاكل، ليه فيه مشاكل في النشاط ده؟
المشاكل في النشاط ده في جانبين: الجانب الديني والجانب التربوي، وسيتم تناولهم بالتفصيل في السطور القادمة.
الجانب الديني
تجسيد الميزان بكفتين يدخل تحت الغيبيات، اللي ملناش أننا نجسدها جانب تاني مهم ألا وهو الستر،أيوة بالضبط الستر.من نعمة ربنا وفضل الله علينا سبحانه وتعالى نعمة الستر.
احنا الكبار المكلفين اللي كل عمل لينا نُحاسب عليه (من رب العالمين مش من بشر) ، الشخص منا أصلاً ميعرفش حسناته وسيئاته وعددها وأيهم أكتر من التاني.
ف ليه نعمل كده مع أطفالنا؟
ليه نحط نفسنا في موضع أننا نحاسبهم ونحدد ايه من سلوكهم أو أعمالهم الجيد وايه منهم السيء! ونحدد كمان مكافأة أو عقوبة!
ربنا هو وحده سبحانه وتعالى اللي هيحاسبنا
الحسنات والسيئات اللي مبني عليهم الفكرة، تقييم الأمهات ليهم بيكون بناءا على ايه؟مثلاً اذا الطفل لم يرتب سريره كده سيئة، مخلصش أكله سيئة.
أما لما يسمع كلام مامته أو باباه "يسمع الكلام هنا بيكون المقصود اعمل حاضر، شيل حاضر، لا ده ممنوع حاضر" بيعتبروها حسنة!
بناءاً على ايه بيتم هذا التقييم وهل احنا في ديينا السيئات بالسهولة دي بتكتب؟
ده حتى من نعمة ورحمة ربنا علينا أن فيه استغفار وتوبة
رحمة ربنا سبحانه وتعالى التي وسعت كل شيء فتقديراتنا نحن البشر تختلف تماماُ عن تقدير ربنا سبحانه وتعالى.
فالحسنة بعشرة أمثالها والله يضاعف لمن يشاء ، في حين أن السيئة بواحدة مثلها. فيه نقطة كمان إن الحسنة بعشر أمثالها إلى سبعمائة ضعف والسيئة بمثلها.
ومن هم بحسنة ولم يفعلها كتبت له حسنة، ومن هم بسيئة ولم يفعلها كتبت له حسنة.
يعني الموضوع داخل فيه نوايا!و النية التي هي أصل كل فعل.
قال رسول الله صلى الله عليه وسلم : " إنما الأعمال بالنيات ، ولكل امريء ما نوى، فمن كانت هجرته إلى الله ورسوله فهجرته إلى الله ورسوله ومن كانت هجرته إلى دنيا يصيبها أو امرأة ينكحها فهجرته إلى ما هاجر إليه"
الحديث رواه عمر بن الخطاب. المحدث : البخاري. حكم الحديث: صحيح
يعني نظام حساب الحسنات والسيئات بالمفهوم الديني مفيش بشر يقدر يحسبه أبداً، وفكرة تجسيده فيها ظلم للطفل وخلط مفاهيم وده هوضحه أكتر في الجانب التربوي
لما بحثت في الموضوع لقيت صيغ مرعبة للطفل بمعنى الكلمة 
اذا الطفل في نهاية اليوم كفة السيئات أكبر يبقى خسر يومه 
(مش عارفه أعلق اقول ايه) والتاني اذا في نهاية اليوم كفة السيئات أكبر يتعاقب ويتحرم كمان (هعيط والله ) حقيقي قلبي وجعني لما قريت الكلام ده، ايه الرعب ده؟
الجزاء عند ربنا سبحانه وتعالى لعباده يوم الدين (على أعمال الإنسان طول حياته ، ومن رحمة ربنا إن كمان الحساب بيكون بعد البلوغ)، ده غير كمان أن الحسنات تذهبن السيئات.
ييجي حد يطبق الفكرة بالطريقة دي ازاي ؟ طريقة فيها قهر وسلطة ، طيب شايفه انه كده اتعلم حاجة ؟!وقبل ما ندخل في الجانب التربوي
جربتي أنت تفكري في أعمالك بالطريقة دي وتحاسبي نفسك بنفس الطريقة، شوفي مشاعرك ايه وقتها؟
أو تصوري جوزك في آخر اليوم جه وقال لك أنت عملتي كذا وكذا وحش (الاكل وحش، البيت مش مرتب أو غيرها) وده كان أقل من عملك الحلو خلال اليوم عشان كده أنتِ محرومة من خروجة نهاية الأسبوع.
احساسك ايه؟
في طرق تانيه كتييير عشان تعدلي السلوك عند طفلك (هوضحه في الأسطر القادمة) بعيداً عن فكرة الحسنات والسيئات بالطريقة ديالجانب التربوي فكرة عمل الميزان ووضعها معلقة لكل طفل من الأطفال في البيتقادرة أنها تخلق عنده مشاعر الإحباط والحقد وتزود الغيرة بين الأخوات (مين حقق حسنات أكتر؟ طيب مين يومه كان وحش وسيئاته كانت أكتر؟ مين مميز ومين لا؟ و غيرها)
ف ليه نحط نفسنا في مشاكل أكبر وبعدين نجري ندور على حلول؟!
مشاعر الإحباط اللي ممكن تتكون عند الطفل.تصوري طفل في يوم سلوكه كان غير مرغوب فيه (أكيد لسبب عنده) وتيجي تقولي له أعمالك السيئة كتير اليوم أو حتى يشوفها على لوحة !
ممكن يحس بإحباط وميحاولش يحسن من نفسه
أو يقول هي خربانه أصلاً هكمل زي ما أنا ويزود في السلوكيات الغير مرغوب فيها.
الطفل هيركز بالطريقة دي على أنه يظهر بشكل حلو قدام أهله عشان يرضيهم وممكن في الخفاء يعمل اللي عايزة.ليه تربي فيهم أنهم يعملوا الفعل عشان شكلهم يكون حلو، الأولى نربي فيهم تقييمهم لذاتهم، وأنهم يعرفوا ويقدروا يحددوا المشكلة عشان يصلحوها. وضيفي على كده أن الطريقة دي ممكن تقلل من إحساس الطفل لما يكبر بموضوع الحسنات والسيئات (بسبب عدم وجود الستر اللي وضحتها فوق).
الاستخدام للفكرة دي الخاطيء هيعمل خلط للمفاهيم عند الطفل.ازاااي؟
يعني لما تحطي لطفلك سيئة عشان مسمعش كلامك أو قال لأ أو لم ينظف مكانه، ده هيعمل لخبطة بين الأعمال اللي فعلا ربنا حذرنا منها أو اللي تحسب فعلا سيئة.
فيا ريت نستخدم الكلمات الصح في موضوعها
فالحسنة
تختلف عن السلوك الايجابيوالسيئة
تختلف عن السلوك السلبيالطريقة دي ممكن تربي في الطفل انه ينتقد سلوكيات اللي حواليه. ويبدأ يقييم الناس، ده صح وده غلط.واحنا أصلاً بنعاني من الناس اللي بتصدر أحكامها على اللي حواليها، فنربي كمان ده في أطفالنا؟!
طيب والحل ايه؟
أنت أم عايزة تربي طفلك على السلوك الإيجابي وتقللي السلبي تعملي ايه؟
تعالي وهقول لك
ركزي على السلوك الإيجابي وشجعي طفلك عليه، بأنك تحددي السلوك وتبيني حسن تصرفه كان فين؟مثال: طفلك الصغير كان بيعيط وأنت بعيدة، ولقيتي الكبير طبطب عليه وحاول يشوفه محتاج ايه. هنا تشكري طفلك على فعله، وممكن تقولي له أنت أحسنت التصرف لما حاولت تطبطب على أخوك وتساعده أنا فخورة بيك
بدلا من
أنك تركزي عليه وهو بيزعق لأخوه عشان شد اللعبه منه مثلاف زي ما بتاخدي بالك من السلوكيات الغير مرغوب فيها، ركزي كمان على الإيجابي (المرغوب فيه) عشان يكبر ويزيد.
الطفل عمل سلوك غير مرغوب فيه تعملي ايه؟يبقى تتكلمي مع طفلك، وتعرفي مشاعره ، وسبب سلوكه أصلاً ايه؟ وكان بيفكر ازاي وقتها؟
من الاحتمالات أنه يكون بجهل منه أصلاً، او ميعرفش، أو نسي أو غيرها.
وبعد ما تعرفي السبب
خليه يفكر معاكِ وتحددوا المشكلة فين وطريقة حلها ايه.
أنت كده عملتي ايه؟
بتحاولي أنك تدربيه وتعلميه ازاي يتعامل مع مشاعره؟ازاي لما يكون فيه مشكلة بعد ما يحدد مشاعره يقدر يحددهاوبعد الاعتراف بوجود مشكلة وتحديدها، ييجي التفكير في حلول وبدائل. كده اتعلم من الموقف، ولما يتعرض له بعد كده حتى وإن كان تصرفه خاطئ، هيبدأ يفكر بطريقة تانية.اذا عايزة تعملي نظام القوائم بالمهام يبقى تاخدي بالك من: لما تعملي قائمة بالمهام أو القواعد تكون من خلال اجتماع أسري ويكون فيه المهام واضحة لكل واحد في الأسرة بالإتفاق كلكم سوا. المهام تكون مناسبة لكل طفل حسب عمره وقدراته عشان ميحسش بالعجز. يكون فيه مرونة ووضع بعض الاستثناءات. اذا هتعملي لوحة أو ورقة مكتوبة بالمهام للطفل اعمليها بنظام ال To do list ازاي؟
يعني أنكم مثلا هتحددوا لفلان على مدار اليوم بعض المهام (تكون واضحة مكتوبة أو مصورة حسب السن ومتكونش كتير).
المهمة اللي تخلص يتحط جنبها علامة صح أو طابع أو ستيكر أو غيره.
طيب واللي لم تنفذ؟
يكون في جانب الورقة خانة للمهام التي لم تنفذ، وممكن تترحل لليوم التاني.
كده أنت ربيتي في طفلك ازاي يرتب مهامه وينفذها ويرتب أولوياته كمان، بدون استخدام أسلوب تهديد أو لوم وانتقاد حاد يحبط الطفل ولما تركزي على المهام اللي نفذها، حتى وإن كنتي شايفاها بسيطة بس هو خد من وقته ومجهوده، تشجيعك ليه هيخليه يحس بالإنجاز،ويربي فيه معنى الإنجاز وتقديره لذاته وأفعاله.وأخيراً عايزة أقول كلمتين مهمين
احنا في تربيتنا لأولادنا، هدفنا أننا نربي طفل سوي يقدر بعد كده يعتمد على نفسه، ويتحمل مسؤولية أفعاله ويقدر يبحث عن حلول.
مش إنسان لما يكبر يفضل يدور على ماما وبابا اللي هيحلوا له مشاكله، ولا هيفضل مستني رأي اللي حواليه فيه وفي تصرفاته لأنه مقدر ذاته.
محتاجين يكون هو جواه البوصلة اللي بتساعده وتوجهه صح، ولما يغلط يتعلم من غلطه. مين فينا مش بيغلط؟ أخطأئنا فرص كبيرة عشان نتعلم منها.
ونصيحة من أختك، قبل ما تعجبك أو تنبهري بفكرة وتطبيقيها على أولادك.
اقفي لحظة وفكري وجربي إذا أنتِ مكان طفلك وعملتي الفكرة دي هتحسي بايه؟ مشاعرك ايه؟ هتستفادي ايه من وراها؟ ؟ وإذا حسيتي إنك تايهه اسألي حد متخصص من أهل العلم الثقة
لأن ببساطة أطفالنا ونفسياتهم مش للتجارب
اللهم إني أسألك صالح النية
وما توفيقي إلا من فضل الله سبحانه وتعالى وأي تقصير فهو مني فاغفر لي يا رب تقصيري
لا تنسوني من صالح دعائكم في هذه الليالي العظيمة
اللهم إني أسألك علماً نافعاً ورزقاً طيباً وعملاً متقبلاً
دمتم طيبين وبخير
بقلمي
شيماء الجميل