التصرف الصحيح عندما يتعرض طفلى للضرب من أطفال أخرين
لما طفلك يبدأ يدخل فى مجتمع كبير ويشوف أطفال غيره سواء فى مدرسة او فى نادى ويحتك بيهم
لازم زى ما إتفاقنا قبل كدا انك تعرفه ان ممكن يقابل اطفال غيره سلوكهم غلط ومش كويس
وتيجى خطوة مهمة بعد كدا انك تعلمه إزاى يتعامل مع الغلط
خصوصا لو حد من الاطفال ضربه أو أخد لعبته
وقتها الاحسن ان الاب والام يتدخلوا هما..
ولا يعرفوا الطفل يعمل اية ويسبوه هو يتصرف؟
الافضل ان الطفل هو اللى يتصرف
لان مش فى كل المواقف الاب والام هيكونوا موجودين مع الطفل..وعشان لما يكبر يبقى عارف إزاى يتعامل مع الناس
فلازم أخليه هو اللى يتصرف
وده هيزود ثقته فى نفسه كتير خصوصا لو تصرفه جاب نتيجة وقدر يحمى نفسه ويفرض احترامه على اللى حواليه
ودور الأهل هنا يبقى متابعة..مش معنى ان الطفل هو اللى هيتصرف يبقى أنا ما أهتمش وما أظهرش إهتمامى للطفل
(لو طفل ضرب إبنى فى النادى أو حديقة أو أى مكان عام)
"من سن 4 لـ 8 سنين"
اتكلم مع إبنك..قوله ماتخليش حد يضربك ابدا وانت كمان أوعى تضرب حد من زمايلك
وإلعبوا مع بعض وإشتركوا فى إلعابكم..وبعد ماتخلصوا لعب كل واحد ياخد اللعبة بتاعته
ماتخليش حد ياخد لعبتك منك ولا انت تاخد لعبة حد وتيجى تقولى لو حصل حاجة زى كدا..
بس الأول قبل ماتيجى تقولى لازم تتصرف مع الولد اللى ضربك صح..يعنى:
1- لو حد من الاطفال ضربك قوله :"لو ضربتنى تانى هقول لباباك"
2- ولو رجع وضربك تانى قوله:"انا قولتلك لو ضربتنى هروح أقول لباباك ومامتك..وأنا دلوقتى رايح أقوله"
و روح وقتها لباباه وقوله بذوق: (فلان ابن حضرتك ضربنى ممكن حضرتك تيجى معايا وتقوله يبطل يضربنى..لو سمحت)
3- لو اتكرر تانى ونفس الطفل ده ضربك قوله: " على فكرة انا ممكن اضربك بس الضرب ده سلوك مش حلو وانا مش بحب أعمله ولو ضربتنى تانى هضربك ومش هلعب معاك تانى"
وبعدين روح عرف باباه انه رجع ضربك تانى وماسمعش الكلام وانك قولتله لو ضربك تانى مش هتلعب معاه ابدا
4- لو الطفل ضربك تانى..ساعتها اضربه زى ماضربك وبطل تلعب معاه تانى
بالنسبة لدور الأهل فى أول مرة (وبعد ما الطفل يتصرف من نفسه)..بيروح الاب يكلم الولد اللى بيضرب ويقوله:" انت ليه ضربت صاحبك فلان؟..لو عامل حاجة تضايقك ماتضربوش ممكن تيجى تشتكينى لان الضرب ده حاجة وحشة وسلوك مش كويس وانت شكلك ولد مؤدب والمؤدبيين مايعملوش كدا"
وفى تانى مرة يكلم والد الطفل ده ويقوله :
"ابنى دايما بيشتكى ان ابن حضرك بيضربه..ياريت تتكلم معاه وتخليه يبطل يضرب إبنى"
وطبعا فى كل مرة الطفل بيجى للأهل ويحكلهم اللى حصل ..لازم يشجعوا تصرفه الصح ويمدحوه لانه ما اتصرفش بسلوك عدوانى لكنه عمل سلوك يحترم
* * * * *
وهنا الطفل فى البداية حذر الطفل اللى ضربه عشان يديله فرصة يحسن سلوكه وبعدين دخل والد الطفل اللى بيضرب فى الموضوع عشان يهذبوا سلوكه ويخلوه يتعامل كويس مع الناس
ولو مش حاسين بمشكلة عند طفلهم يبدأوا ياخدوا بالهم
وعرف الطفل التانى انه مش ضعيف وقادر يضربه هو كمان..
لان فى أطفال بتفكر انهم لما يضربوا أطفال غيرهم وبيسكتوا مش بيردوا بيعتبروهم خايفين وجبنا..فلو ردوا على ضربهم بضرب مش بيكرروا ده تانى معاهم
والاهم من ده ابنك مش هيقولك فى يوم انتوا خالتونى ضعيف وزمايلى وبيقولوا عليا ضعيف وجبان ومش بعرف أدافع عن نفسى
وده ممكن يخليه يغضب بشده ويبقى عنيف بدرجة كبيرة عشان ينفى التهمة عنه
وفى الاخر خالص الطفل المضروب عاقب الطفل اللى بيضرب وكمان لفت نظر أهل الولد ده انه بسبب سلوك إبنه ممكن يخسر صحابه
يعنى التصرف ده كان مفيد للطفلين
بالاضافة لده ان الطفل لما يكبر هيكون أكتسب خبرات فى التعامل مع الناس وهيبقى فرض احترامه على اللى يتعامل معاه
(لو طفل ضرب إبنى فى المدرسة)
هعرف ابنى يقوم بنفس التصرف السابق:
1- يحذر زميله انه هيعرف المُدرسة
2- يقول للمُدرسة إن زميله ضربه
3- يقول لزميله "انا مش بحب الضرب بس لو ضربتنى تانى هضربك ومش هكلمك تانى"
4- يضرب زميله ومايكلموش تانى
و هنا تصرف الاهل هيكون مختلف
(طبعا فى الاول بيشجعوا إبنهم على تصرفه مع زميله)
ولان فى المدرسة ممكن المُدرسة ماتهتمش بالموضوع وماتعاقبش الطفل الغلطان ولا حتى تفكر تهذب سلوكه!!
فلازم الام تروح المدرسة وتقابل الطفل اللى بيضرب ابنها وتتكلم معاه وتنصحه مايعملش كدا تانى
وتعرف المُدرسة بالموضوع وان فى طفل بيضرب إبنها وتطلب منها الاهتمام
لو اتكرر موضوع الضرب تانى من نفس الطفل
الام بتطلب رقم أهل الولد سواء من الولد نفسه او من المدرسة
وتكلم والدة الطفل ده وتطلب منها تحاول تخلى ابنها يبطل يضرب زمايله
وده فى سن (4-8 سنين)
(1 ملحوظة):
عودى طفلك يحكيلك يومه فى المدرسة وإسمعيله بإهتمام
(ملحوظة 2):
لو الطفل سنه سنة ونص أو سنتين وبيعلب مع أطفال فى نفس سنه وحصل وطفل تانى ضربه أو أخد لعبته
هنا الطفل لسه سنه صغير على انه يتصرف من نفسه
اصلا هو فى السن ده مش هيكون لسه عرف يتكلم أو فهم الكلام المتوجه له
وقتها هنا ممكن الام تدخل وبالراحة تبعد طفلها عن الولد اللى ضربه وتحاول تهدى الوضع وتخليهم يرجعوا يلعبوا مع بعض تانى
انما من سن (4سنين لـ8سنين) هيكون الطفل كبر وهيبقى قادر على انه يتصرف..ودورك انك تعرف ابنك ازاى يتعامل فى المواقف دى من نفسه..مع تدخل منك بعد تصرف الطفل
ومن سن (8سنين فأكبر) الطفل هيبقى أخد خبرة كبيرة فى التعامل مع الناس وهيبقى قادر على التصرف بشكل كبير من غير أى تدخل منك نهائى
2- لو طفلك هو اللى بيضرب الاطفال التانيين
الحالة دى ليها أسباب كتير أهمها وأبرزها:
أولا: مشاهدة الطفل للعنف على التليفزيون
لازم تبقى فى رقابة على اللى الطفل بيشوفه..ماينفعش أدى للطفل الحرية الكاملة فى الفرجة على التليفزيون..خصوصا وهو لسه فى مرحلة التكوين وبيقلد اللى بيشوفه
غير كدا أفضل سن لمشاهدة التليفزيون هو على ""الاقل"" تلات سنين وبساعات محددة "ساعة أو اتنين"
فلازم مشاهد العنف اللى بيشوفها الطفل على التليفزيون تتمنع عشان أقلل من سلوكه العدوانى
ثانيا: مشاهدة الطفل للعنف من أبوه أو أمه وتعرضه للضرب منهم وسماعه لجمل زى:
(هموتك من الضرب-هقطم رقابتك-هقطع جسمك من القرص....)
او إهانات وعنف لفظى بالسب والسخرية
كل ده يخلى الطفل يتعامل بعنف مع غيره لإنه ببساطة إتعود على الطريقة دى فى التعامل مع الناس
فلازم اوقف إسلوبى العنيف مع طفلى وبعدين أهذب سلوكه للصح
(ملحوظة):
"صعب تطلب من طفلك يبطل سلوك انت بتعمله..لازم تبطله انت الاول"
ثالثا: رغبة الطفل فى جذب الإنتباه له
يعنى لو كان فى تجمع مع أطفال غيره وحب يجذب انتباه أمه او حب يخلى كل العيون عليه ويفوز بإهتمام اللى حواليه فبيقوم يضرب فى الاطفال التانية
فبيحس بكدا انه بطل الحفلة
وده التعامل معاه.. انى لما ألاقيه بيعمل التصرف ده مانتبهش ليه هو ولا حتى أروح أشيله وأبعده عن الاطفال..لا ده انا أروح أبعد الأطفال التانيين عنه وأطبطب عليه وأصالحهم وأسيبه
فيحس ان تصرفه جاب نتيجة عكسية
وبعدين أخده هو على جنب وأكلمه وأعرفه انى مش مبسوطة أبدا من تصرفه ده وزعلانة منه..وأقوله غلط تضرب أطفال غيرك..ولو اتكرر تانى هحرمك من كذا وهخاصمك كمان
ويبقى دورك انك تظهرى إهتمامك وإنتباهك لطفلك لما يعمل سلوك حلو
يعنى لو بيلعب مع أطفال تانيين وشوفتى عليه سلوك حلو قوليله شاطر برافو عليك..او قومى بوسيه وقوليله انا مبسوطة انه بتلعب بهدوء ومؤدب
فيعرف ان السلوك الكويس هو اللى بيجذب الانتباه له
- وأخيرا عصبية الطفل
واللى بيكون ناتج عن عصبية الام أو الاب
والتعامل مع الطفل ده الأول بتقليل التوتر والعصبية حواليه ونحاول نوفرله جو هادى مافيهوش عصبية وزعيق ونرفزة ونعامله بالراحة وهدوء
هنا انتى بتراقبى طفلك لو لاقتيه ضرب طفل تانى او عضه ..بتشيلى إبنك وتاخديه بعيد شوية لحد ما يهدأ وتكلميه وتقوليله ده تصرف مش حلو كدا صحابك هيبعدوا عنك ومش هيرضوا يلعبوا معاك
وممكن كمان يضربوك..انت تحب حد يضربك؟
حاول ماتضربش أصحابك تانى ولو لاقيت نفسك اتضايقت من حد روح إشتكيه لمامته أو إبعد عنه ماتكلموش
لما إبنى يضرب حد اتصرف معاه ازاى؟
بعد التوقف عن الاسباب الرئيسية السابقة اللى بتخلى الطفل عدوانى
بنيجى للتصرف الصحيح مع الطفل والعقاب السليم
(والعقاب بيجى بعد الحوار مع الطفل وإعطائه فرصة لتحسين سلوكه)
لما أشوف إبنى بيضرب حد أو أعرف انه ضرب حد
أسأله ليه عاملت كدا؟
لو السبب ان فى طفل أخد منه حاجة أو ضايقه أو شتمه
أعلمه إزاى يتصرف بشكل صحيح مع الموقف ده:
- يحذر الطفل اللى ضايفه ده انه هيعرف باباه عن سلوكه..لو ما إعتبارش بالتحذير
- يروح يقول لباباه (ابن حضرتك عامل كذا وكذا ولو سمحت خليه يبطل يضايقنى)
- لو لسه بيضايقه يبقى يبطل يلعب معاه
انما مايستخدمش الضرب كأسلوب للتعامل مع الناس لانه غلط وأنى بزعل منه لما بشوفه بيضرب غيره
طب لو الطفل بيضرب زمايله وبيعضهم ومش عايز يبطل الاسلوب ده أو مافيش سبب مقنع من ضربه لزمايله..وقتها العقاب يبقى إزاى؟
بعد ما أتكلم معاه واعرفه غلطه وأبقى مفهه انه لو مابطلش السلوك ده هعاقبه ومش هقبل منه أى إعتذار
ببدأ معاه أول حاجة بالخصام
(الاب والام الاتنين بيخاصموا الطفل لمدة يوم كامل ولو سنه كبير شوية ممكن فترة الخصام تزيد)
بعدها لو الطفل كرر نفس السلوك
اعرفه ان المرة الجاية العقاب هيبقى شديد وتديله فرصة يحسن سلوكه
لو كان لسه مستمر
يبقى أحرمه من الخروج فى الاجازات..
وأرجع تانى أديله فرصة يتحسن
لسه بيكرر السلوك
يبقى أخرجه لكن أمنعه من اللعب مع أصحابه ولفترة كبيرة تلات مرات مثلا..كل ما يخرج مايلعبش مع زمايله