أبناؤنا_والصيام
رمضان خلاص هيبدأ بإذن الله كل سنة وحضراتكم طيبين 
وأكثر سؤال بيتم السؤال عنه بالنسبة للأطفال هو ولادنا يبدأوا يصوموا من إمتى ويصوموا كام ساعة في اليوم؟!
مبدئيا كده متعودوش ولادكم على الصيام قبل سن 7 سنين، بلاش ترهقوهم وتكلفوهم فوق طاقتهم، ابدؤوا زي ما النبي علمنا اننا نعلم ولادنا الصلاة في سن السبع سنين وكذلك الصيام،إنما لو الطفل حب يصوم زي الكبار من قبل كده وهو اللي حابب يشارك فمش مشكلة سيبوه يشارك.
طيب الطفل لو لسه بيتعلم الصيام ممكن يصوم كام ساعة؟! إحنا عندنا أكثر من تصور لو الطفل لسه هيتعلم الصيام- ممكن الطفل يقوم يتسحر عادي ويصوم من أول اليوم ويفطر الظهر أو قرب العصر حسب قدرته على التحمل ويا إما يكمل فطار يا إما تخلوه يصوم تاني لحد المغرب ويفطر معاكم علسان يحس بروح الفطار وتجميعة الأسرة عليه وفرحة الفطار في حد ذاته
- ممكن الطفل ما يقومش يتسحر علشان ينام ويرتاح لكن أول ما يصحى يفطر وبعدين يبتدي يصوم ودا لأن وجبة الفطار مهمة جدااااااااا ودي أفضل وأنسب طريقة
الفكرة إنه الطفل لازم يفطر أو يتسخر لأن الوجبة دي مهمة جدا لنمو جسمه في سنه الصغير دا
في بعض الملاحظات كمان لازم تاخدوا بالكم منها - خدوا بالكم انه مينفعش تخالوا الطفل يشرب وهو صايم علشان يتعود إن الصيام صيام مينفعش يبقا صايم ويشرب أو ياكل لقمة تصبيرة
- كمان متكرهوش الطفل في الصيام وتحسسوه إنه عقاب فابدؤوا معاه بما يتناسب مع إمكانياته وطاقته ولو هيصوم ساعتين بلاش تكرهوه في للصيام
- مهم جدا كمان تكافئوا الطفل على صيامه كل يوم وكل ما عدد الساعات بتاعت الصيام تزيد كافئوه مكافئة أكبر
وهمزل هنا مجموعة من الصور ممكن تطبعوها كجداول علشان مكافئة ولادكم لما يصوموا
- علموا ولادكم إن الهدف من الصيام مش الجوع والعطش أو الصوم قدام الناس وبس لكن الهدف منه إننا بنتقي ربنا وبنصوم له حتى لو محادش شايفنا واحنا بناكل فربنا هيشوفنا وبيراقبنا ومطلع علينا
- بلاش تحسسوا ولادكم إن الصيام حاجة تقيلة ، يعني بلاش تتعصبوا وتزعقوا وتقولوا ابعدوا عن وشي الساعة دي أنا صايم ومش طايق كلمة من حد والكلام دا حسسوهم إن الصيام تهذيب للنفوس وتحسين لسلوكياتنا السيئة
كل عام وحضراتكم جميعا بخير وصحة وسعادة، وتقبل الله منا ومنكم
#رمضان_كريم
#إشراقة_تربوية
#د_خالد_عبدالمنعم