بتقطمي في ولادك ليه ؟! - كبسولات تربوية

مؤخرا بقيت بلاحظ و أنا بشتغل مع الأطفال أن درجة تركيزهم في أمانهم في الضياع بالنسبة لسنهم الاقي طفل عنده 8 و 9 سنين بيعمل تصرفات خطر أو فيها عدم تمييز كأنه 5 سنين
الموضوع ده ممكن يبقي لي أسباب كتير بس أنا النهاردة هاخده من منظور #التقطيم
التقطيم هو من أكتر الأسباب القوية اللي بتخلي الطفل يكرر نفس الحادث و ميتعلمش منه يقع نفس الواقعة ,يكسر كبايات أكتر ,يتعور تاني و تالت و رابع و المعدل يزيد أو يتعقد و يقرر ميتعاملش أصلا مع الحاجة دي .
عارفين ليه ؟
نركز بقي 😎
إحنا سلوكنا بيجي إزاي ؟
بيحصل حدث معيين
بنكون أفكار
الافكار بتولد شعور
الشعور بيولد قرار

منعرفش نتحكم في مشاعرنا و قراراتنا إلا لو الفكرة إتغيرت ,فالفكرة هي الأساس لو إتضرب فيها مفك خلاص كده بوظنا كل حاجة فالتراك الطبيعي الفطري اللي ربنا خلق ولادنا بيه إنهم لما يمروا بحادث معيين لوحدهم خاااااااااالص بياخدوا خبرة من عواقبه الطبيعية
يعني طفل رباط جزمته مفكوك و بيجري وقع
-الفكرة : أنا وقعت ,هو إيه اللي حصل ,هو ده من الرباط
-الشعور : الم أو عدم إرتياح أو خضه ....
-القرار : هيركز أكتر بعد كده إنه ميجريش و الرباط مفكوك أو يدخل الرباط جوه الجزمة أو ....
*هتتكون خبرة في المخ يتبني عليها أصلا بعد كده! و عموما تركيزه هيزيد لإن موقف علي موقف هو دماغه شغاله زي ما ربنا خلقها بتشتغل.

لما بقي يحصل الأتي :
طفل رباط جزمته مفكوك و بيجري وقع
ماما : ينفع كده ! مش تاخد بالك ,كام مره قولت متجريش ....و بتوصل لحد التشفي : أحسن علشان أنا قولت و إنت مسمعتش الكلام ! أو تضربه
الفكرة : ماما مش فاهماني , هي بتزعقلي كده ليه ,أنا بوظت الدنيا .....
مشاعر : إحباط ,ظلم, نفور ,يصعب عليه نفسه ...
قرار : ماما مبتحبنيش أو أنا هخبي عليها لو جرالي حاجة تاني أو ....
*هتتكون عنده أفكار مغلوطة عن علاقتكوا و هيفضل المخ مركز علي كل تفصيله تأكد الأفكار دي فسلوكه معاكي هيبقي مع الوقت أسوء

فين بقي الجزمة و الرباط من كل ده ؟! التقطيم أسرع قاااااتل و مفسد للخبرة لإنك من قبل ما حتي يفكر إنت بتغيري مسار الفكرة بتشتتيه عن الحدث الحقيقي المخ مش بيلحق يحلل أي حاجة لإنك بتوجهيله حدث أعلي و أشد و أكثر إزعاجا فهو أصلا بينسي و الموضوع يقلب خناقة و بس ! و فعليا الموقف الأساسي إترمي كده في الباسكت
و مع كل مره بيحصل حادث جديد بتقطميه أكتر لإنك نبهتي بقي فبتفسدي الخبرة تاني و يفضل المخ يعافر علشان يتعلم و إنت تعافري علشان تبوظي الخبرة في الأخر نلاقي طفل عنده 10 سنين خبرته لا تتعدي ال 6 فتخافي عليه أكتر فتقطميه أكتر ...

*بشوف ده في أقسي صوره لما الاقي طفل أتعور ولا وقع واقعة شديدة جدا و قبل ما يقول موجوع يقول محدش يقول لماما 😭
لا تتخيلوا الموقف ده بيتكرر إزاي بجد معدل مرعب إزاي الطفل ده بقي خايف من الإيذاء النفسي و دايرة التقطيم أكتر من كوعه ولا رجله اللي بتنزف ؟ إزاي قصاد خضه الواقعه و شكل الدم هو أول حاجة جت في دماغه متقولوش لماما ده أكبر دليل إن الفكرة أتشوهت و أتغيرت و إن الحادث بقي مرتبط بفكرة الخوف من اللوم مش الخوف علي نفسي أصلا فطرتهم نفسها إتغيرت 💔

مش هنسي مره كنت بشتغل مع الأطفال و واحد وقع رجله إتلوت و ماشي بيعرج و أول ما عرف إن مامته جت لقيته بيدوس عليها عادي علشان يبان طبيعي و بيحط إيده علي بوقي و إحنا خارجينلها علشان محكيش
و مره و إحنا في المدرسة زمان ولد صباعه إتقطع من المروحة و كان عمال يعييط و يترجاهم ميكلموش مامته و إحنا كنا وقتها في 5 إبتدائي !
لما الطفل يقع و يترزع في الأرض و يلاقي مامته بصاله فيكتم الوجع و يقولها مش وجعاني علشان خايف من وجع التقطيم
و مره طفل حشر سوستة قلم في مناخيره و خاف يقول لمامته لحد ما إزرق و لو أقعد أحكيلكوا لبكرة مش هخلص

الموضوع مبقاش هزار ولا علي قد واقعة و خبطة إوعوا تفتكروا إن الأطفال اللي بيتربوا بالتقطيم في المواقف الصغيرة هيجيوا يمييزوا إنكوا في المصايب مش هتقطموهم و هيحكوا بقي بالعكس لإن أصلا التقطيم بيضيع التمييز و لإن حدوث ضرر ليهم بقي مرتبط بفكرة الخوف منكم فكل ما الضرر يزيد وارد الخوف من الحكي يزيد .في الشهر الأخير للمقابلات كان معدل الأطفال اللي تعرضوا لتنمر أو تحرش و مقالوش لأهلهم و إكتشفوا بالصدفة صادم و دايما لما كنت بسأل الأم علي التقطيم تقولي أه ده إسلوبي .

فأرجوكم لما الولاد يحصلهم حاجة يكفي أوي :
-تعريف مشاعر :ياه أكيد بتوجع أنا حاسة بيك و تاخديه في حضنك .
و لو باين العاقبه للطفل خلاص كفاية لو حاسة إنه مش فاهم أصلا اللي حصل ممكن لما يهدي تسألي : هو إنت وقعت إمتي ؟
و أنا بجري هنا ؟
أه طب كان الرباط كده ؟
ممم خير يا حبيبي أنا عارفة إنك هتلاقي حل
و خلصنا علي كده
لو حاسة إنه نقص مهارات ممكن وقت تاني خالص تدربيه علي المهارة دي أو تفكرولها في حلول

الحل مش أبدا إنك برضه تخشي للطفل دلوقتي تخوفيه و تقوليله لو حصلك حاجة إنطق و تقرريه ,الحل ببساطة إنك لما يقع في أي عاقبه لا يتمناها تتعاملي صح
فعلا متمنالكوش تربية بالتقطيم خايفة عليكم و علي الولاد من السكة دي و الله ما أحسن حاجة ليكوا ولا ليها فايدة
هحطلكوا فيديو مهارات الإستماع في كومنت علشان لو إبنك جي يحكيلك عن موقف ضايقه برضه تتصرفي إزاي

#التقطيم_بيوجع

منة صلاح نجم

#كبسولات_تربوية