طفلك وأحلامه
#الحلم عموما هو نافذة للحالة النفسية اللي بيمر بيها الشخص، وخصوصا الطفل، لأن الطفل غالبا مبيقدرش يعبر عن احتياجه النفسي أو عن اللي بيدور جواه، وبالتالي الحلم بيكون هو النافذة اللي من خلالها نقدر نشوف ونعرف مكنونات أطفالنا النفسية والحالة اللي بيمروا بيها..
ولو قسمنا الأحلام اللي أطفالنا ممكن يحلموا بيها في نومهم فممكن نقسمها لنوعين:
#حلم_ساذج🤤: وهو الحاجة اللي الطفل بيتمنى إنه يحصل عليها في حياته واستيقاظه، يعني مثلا نفسه يجيله عجلة، فينام بالليل ويحلم إن عمده عجلة وانه راكب عليها ومش بعيد نلاقيه بيغني وهو نايم علشان احنا مع بعضينا ولأول مرة لوحدينا 🚲😂
#حلم_مفزع😧: وفيه الطفل بيحلم بحاجة تخوفه زي أسد بيهجم عليه، أو حد عايز يخطفه...
وهنا احنا النهاردة هنتكلم عن أشهر الأحلام المفزعة اللي ممكن يحلم بيها أطفالنا وايه هي الدلالة النفسية لكل حلم؛
#حلم_الوحوش👹
وهنا الطفل بيحلم انه شاف وحش، أو عفريت مستخبي له تحت السرير، أو وحش بيجري وراه...
👨⚕️دلالة الحلم:
إما إنه يكون إجهاد وتعب حصل للطفل، أو إنهرشاف كرتون أو مشهد أو سمع قصة فيها وحوش، أو إن في شخص متسلط في حياة الطفل وبيعامله معاملة فيها قسوة وشدة، ممكن يكون الشخص دا أب أو أم أو حتى مدرس.
#حلم_السقوط
والحلم دا بيحلم فيه الأطفال والكبار بإنهم بيسقطوا من مكان مرتفع.
👨⚕️دلالة الحلم:
هنا في سبب #عضوي وهو التهاب في الأذن الوسطى أو التهاب في طبلة الأذن وغي الحالة دي لازم يتعرض على طبيب أنف وأذن، أو ممكم يكون السبب #نفسي وهو إن غالبا الطفل أو الشخص اللي بيحلم الحلم ده مش حاسس بالاستقرار وقلقان من بعض الأمور الموجودة في حياته واللي لازم نعرفها ونطمنه ليها أو نغيرها.
#حلم_الحشرات🕷
وفيه بيحلم الطفل بإن حشرات بتزحف عليه أو بتهجم عليه أو بتقرصه.
👨⚕️دلالة الحلم:
والحلم دا غالبا مرتبط بخوف الطفل من التغيير أو أو عدم تقبله للتغيير، يعني مثلا غيرنا مدرسته، أو غيرنا مكان السكن، وبالتالي لازم نهيأ الطفل للتغيير قبل حدوثه وكمان لازم نعوده على التغيير ونتطمنه ليه.
#حلم_الساحرة_الشريرة 🧙🏻♀
وفيه الطفل بيحلم بساحرة شريرة بتعمل حاجات مرعبة أو غريبة.
👨⚕️دلالة الحلم:
غالبا بيكون في شخص غريب وغامض ظهر في حياة الطفل والطفل خايف منه أو خايف من أفعاله، أو إن الطفل شاف أو سمع قصص عن الساحرة الشريرة.
#حلم_الحصار
وفيه الطفل بيحلم بإنه متحاصر في مكان أو محبوس وفي خطر بيهدده ومش قادر يتحرك من مكانه ولا قادر يدافع عن نفسه.
👨⚕️دلالة الحلم:
ودا غالبا بيحصل للطفل اللي في مشاكل في حياته ومش قادر يحلها أو يعبر عنها، زي المشاكل الأسرية بين الأب والأم.
#حلم_المتحولون 🧟♂
وفيه الطفل بيحلم بشخص أو لعبة أو حيوان أليف اتحول لحاجة مخيفة ومرعبة.
👨⚕️دلالة الحلم:
هنا الطفل بيكون عنده أصدقاء أو معارف في حياته مش قادر يتعامل معاهم أو متخوف منهم ومن تغييرهم لعلاقتهم بيه.
دي غالبا أشهر الأحلام المرعبة اللي أطفالنا بيحلموا بيها، فلازم لما ولادنا يشكولنا من حلم مخيف أو يقوموا مفزوعين فلازم نهديهم ونطمنهم ونسمع لهم ونبدأ نعرفهم ان دا حلم ومش حاجة حقيقية، بس لازم نحلل الحلم ونعرف دلالته ونتعامل مع الطفل من خلاله.
ربنا يحفظ أطفالنا ويحميهم لينا ويعيننا على تربيتهم تربية صحيحة.