ألعاب لتنمية التفكير الابداعى عند الطفل

#فضفضة

عن كمية المراهقين اللي بيقولوا انهم بيكرهوا اهلهم (الأب او الأم أو الاتنين) ..

ولما تتعمقوا معاهم في الكلام تلاقي تحت الكره دا حب وإشتياق واحتياج بس ممزوج بوجع وألم وجرح كبييييير اوي ..

تخيلوا لما طفل يبقا حاسس انه مرفوض ومكروه وغير مرغوب فيه من اقرب الناس له ..

من أبوه وأمه ..

اللي دورهم الأساسي في الحياة انهم يقدموا له القبول و الحب والرحمة والدعم والكرامة ..

مش الإقصاء ولا الرفض ولا الإهانة !!

تخيلوا نفسيتهم ..

حطوا نفسكم مكانهم !!

حاجة توجع القلب والله ..

تسمع من المراهق كلام من نوعية :

- محدش يحبني ..

- محدش بيسمعني ..

- محدش منهم عاوز يتكلم معايا ..

- محدش بيفكر فيا ولا يفكر انا عاوز ايه ..

- انا عارفة اني غلسة بيقولولي كدا دايما ..

- انا مابفهمش ..

- انا ماليش لازمة ..

- انا فاشل ..

التربية يا جماعة مش اننا نضرب ولا نهزأ ولا نهين ولا نستهزأ بيهم ولا نوجعهم .. ولا إننا نأكدلهم دايما انهم فاشلين ولا إننا نعايرهم ونمن عليهم ولا نقارنهم عشان نثبتلهم انهم قليلين ومايستاهلوش!!

دي مش تربية والله .. دا تدمير نفسية وتكسير شخصية ومشروع إعداد انسان مريض نفسي ..

ولادنا محتاجين يعرفوا ويصدقوا ويؤمنوا انهم مُكرّمين .. محترمين .. ويستحقوا الحب والقبول رغم اختلافهم ورغم نقصهم واخطاءهم الكتير ..

ولادنا بيشوفوا نفسهم بعنينا احنا .. ومن خلال معاملتنا ليهم ..

لما بنتجاهلهم بيشوفوا نفسهم قليلين ولايستحقوا .. بيصدقوا ان مالهمش لازمة ..

لما بننتقدهم ونلومهم -بدل مانحتويهم ونعلمهم- بيصدقوا انهم غلطة ووجودهم غلطة وانهم عبء تقيل غير مرغوب فيه .. فبيكرهوا نفسهم ..

لما نهينهم بيصدقوا انهم رخاص اوي .. وبيتصرفوا على هذا الاساس .. بيبقوا رخاص فعلا !!

لكن لما نرجع للفطرة ..

و لما نفتكر انهم مش ملكية خاصة لينا ..

ونفتكر انهم نعمة من الله زي ماهمّ كدا ..

ولما نعرف انهم هبة من الرحمن .. يهبها لمن يشاء وينزعها ممن يشاء ..

ولما نفتكر ان الله تعالى اودعهم عندنا عشان نرحمهم ونرعاهم ونساعدهم يكتشفوا نفسهم وينموها .. مش عشان احنا اللي نستعملهم لمصلحتنا الشخصية ولا لتحقيق صورة اجتماعية ومكانة من خلالهم ..

ولما نعرف انهم انسان مستقل له حياته الخاصة .. وإنهم مش إمتداد لينا ..

ولما نفتكر انهم بشر لهم كرامة ومشاعر .. بيتوجعوا ويتألموا ويحسوا زينا .. ومحتاجين اهتمام وحب وتشجيع وتقدير ودعم وتغافل .. زينا ..

ولما نفتكر انه تعالى وصانا عليهم .. وهيحاسبنا على الوصية دي ..

لما نفتكر كل دا .. هيبقا سهل علينا نفهم دورنا .. ونحس بولادنا .. و نرجع لدورنا الاساسي اللي هو الدعم والحب والرحمة والتعليم والمصاحبة ..

نبقا معاهم وجنبهم ..

نعلمهم واحنا متقبلين اخطاءهم وانسانيتهم ونقصهم وقلة خبرتهم ..

نتقبل انهم غيرنا ..

وهيفضلوا غيرنا .. في الميول والخبرة والسن ..

 #يوصيكم_الله_في_اولادكم ..

ولادنا وصية الله ..

محتاجين نراجع نفسنا :

هل بنعاملهم كما اوصانا الله؟

هل فكرنا في احتياجاتهم النفسية مننا واشبعناها الأول قبل ما نفكر احنا عاوزين منهم ايه؟

هل بنربيهم لله و بنراقب الله فيهم واللا بنراقب الناس؟

هل احنا راضيين بيهم؟ راضيين بهبة الله لنا؟ واللا بنحاول نغيرهم ونفصلهم على مزاجنا احنا عشان يبقوا حد تاني غيرهم ؟

محتاجين نرجع للفطرة وللدين ..

نرجع للحب والرحمة والانسانية مع نفسنا ومع ولادنا ..

محتاجين نعرف ولادنا ونقبل الموجود فيهم ونرضى به قبل ما ننميه ونطوره ..

محتاجين نراعي ولادنا في احتياجاتهم النفسية والروحية قبل ما نراعي اكلهم و جسمهم ولبسهم ..

محتاجين نفتكر انهم وصية الله ..

محتاجين نحس بيهم ..