🌟ابطل ضرب ازاي ابطل ضرب ازاي ابطل زعيق ازاي ابطل زعيق ازاي..🌟
اعمل ايه لما يعاند و مقضيها عناد و عياط و صريخ و تكسير
اعصابي بتفلت و ما باحسش غير و انا هابدة الواد علقة و بعدين اندم
انا نفسي ابطل ضرب ارجوكي ساعديني🔸🔸🔸🔸🔸🔸
🌟طب انا عارفة الضغوط و عارفة ان والله انتو اعصابكم بتفلت..
مهو انتو لو بتضربوا و انتو هاديين تبقوا مرضى نفسيين و عايزين تروحو مصحات.. اه والله
و تاني وتالت و رابع..
ان والله انا مش عندي عصاية سحرية تحولك لأم ملائكية و أب هادي، الموضوع يتلخص في إن الله لا يغير ما بقوم حتى يغيروا ما بأنفسهم
القرار بإيدكم انتم .. و الخطوات هي ببدء اخذ القرار فعليا.. و بنية صادقة و بدون اسباب عبيطة زي :
اولا ان الطفل هو اللي بيدفعك لضربه🙄..
فدا مش منطقي تماما.. احنا كبار و مكتملين النمو العقلي و العصبي و النفسي،
احنا اللي في ايدنا عصا القيادة.. فبلاش ضعف كدا و تماسكي و خلي عندك الصفات اللي عايزة ابنك يتحلى بيها من ثقة بالنفس و اصرار..
مش عايزة ابنك او بنتك يكونو تعويض للنقص في شخصياتكم
_______
🌟ثانيا و دا المهم .. هل عندكم قواعد بتربوا على اساسها؟
يعني مثلا التلفزيون.. مشاهدته مسموحة ولا ممنوعة؟ و مسموحة قد ايه و ممنوعة امتى؟
الاكل على الكنبة: مسموح ولا ممنوع؟
النوم متأخر مسموح ولا ممنوع
زيارة الاصدقاء في منازلهم مسموح ولا ممنوع
الكلام في التليفون مسموح ولا ممنوع و امتى و قد ايه؟
لبس شوز مخالف في المدرسة مسموح ولا ممنوع
شرب البيبسي و الشيبيسي و الحاجات المضرة،مسموح ولا ممنوع
اه ايه بقى الكلام الجديد دا؟🤔
ايه دخل الكلام دا يا حاجة في اننا عايزين العيال يبطلو زن و يبقو حلوين عشان ما نضربهمش😐
👈 ثالثا بصوا.. في حاجة اسمها التربية بالقواعد..
واحدة من اكبر المشاكل مع ولادنا و اللي بتسبب الزن..
هي ان مش عندنا قاعدة ثابتة..🙃 يعني مثلا..
الاكل على الكنبة ممنوع لما اكون متنرفزة و عصبية و اهب فيه😤.. بينما و انا رايقة و قاعدين نتفرج على التلفزيون عادي يجيب سندوتتش و يقعد جنبي ابني ذو السبع سنوات.. و تعدي!😇
فيقوم في يوم تاني يجي ياكل السندوتش على الكنبة..
يلاقي امنا الغولة في وشه بتصرخ و تقول انا مش قولت ميت مرة مافيش اكل على الكنبة انا لسة غاسلة البياضات و انا هلكانة و طالع عيني و الاكل اتحرق و ابوك منكد عليا!!
يقوم الولد يا ولداه يبصلك و لسان حاله بيقول.. الله مش امبارح ساعة فيلم اسماعيل ياسين كنا بناكل و عادي؟
مثال تاني.. ماما تقول الشكولاتة ممنوعة.. و بعدين تيجيلنا علبة شكولاتة هدية .. نحطها قدامهم في البيت.. قوم الاطفال عندهم اصرار مش طبيعي يفضلوا يزنو يا ماما من فضلك يا ماما لو سمحتي يا ماما ارجوكي يا ماما.. تروحي انتي مزعقة و تقولي طيب خلاص غورو كلو
و بعدين لما نكون في السوبرماركت ناحية الشكولاتة.. يا ماما شكولاتة.. لا مش هانشتري شكلاتة، يا ماما ارجوكي يا ماما الله يخليكي يا ماما يا ماما، ماما تلاقي صاحبتها في السوبرماركت و تبقى عايزة تتكلم معاها.. والاولاد يحسو ببارقة امل اننا ممكن نضغط على ماما فيروحو زانين اكتر يا ماما يا ماما يا ماما.. قوم ايييييييييييه.. ماما تقول طيب طيب خدو اللي انتو عايزينه...
طب يبقى ماما مش عندها قاعدة.. و مش بتمنع و تمنح وفق قواعد
ويا سلام بقى على بابا اللي بيجي مصدع و مالوش خلق اصلا و اي حاجى ماما قايلة عليها ممنوع تبقى مسموح!
يا صباح الضياع التربوي😮
👀 يعني
مشكلة ولادنا اننا بنربي وفق حالتنا المزاجية.. يعني و احنا رايقين قراراتنا تختلف عن و احنا تحت ضغط،
سلوكنا تحت ضغط الناس و كلامهم غير قناعاتنا الشخصية اللي بنحاول نطبقها..
و حطوا تحت الجملة الاخيرة مليون خط..
المفروض نتعامل مع ابناءنا وفق قواعد و قوانين..
لاننا احنا الكبار بنحب نتعامل كدا..
🍃 لما اشتغل في مكان احب اعرف ايه الممنوع و المسموح عشان اعرف اتصرف..
و اعرف ممنوع ليه عشان اقتنع، و اعرف لو خالفت هايجرالي ايه، لاني اكيد مش عايزة اكون تحت رحمة مزاج المدير انهاردة رايق يعديلي المخالفة و بكرة عصبي يطلع عيني. و اعرف امتى يمكن استثناء هذه القاعدة عشان اكيد مافيش قوانين صارمة تماما (و القوانين بالغة الصرامة غالبا لا يتم تطبيقها)
👈يعني:
🔸🔸- قاعدة واضحة (يعني ما ينفعش قاعدة خليك مؤدب.. مؤدب دي يعني اييييه؟)
🔸- سبب (و اياكم و كلمة كدا و خلاص، ولا كدا عشان انا قولت كدا لانه بكدا الطفل هايزن اكثر عشان زي ما انتو عايزين كدا هو عايز كدا غيره)
مثال #مهم
🔸🔸(قاعدة سكر سكر الساعة ستة..)
انا متفقة مع علي و مريم ان مافيش اي سكريات بعد الساعة ستة مساءا (دي القاعدة)
لان السكريات بتخلينا نتنطط وعصبيين و مش بنعرف ننام كويس (وطبعا دا من خلال لعب و افلام ثقافية و غنا و عملت حملة والله في البيت)(دا السبب)
👈جزاء المخالفة وش زعلان في جدول اليوم (وخمس مخالفات في اليوم بحرمان من حاجة بنحبها)
◀️اوقات الاستثناء.. يومي الخميس و الجمعة
و لما يجو يسألو على حاجة فيها سكر.. اقولهم الساعة كام، يلاقوها ستة.
نقول ما ينفعش عشان سكر سكر سكر.
. في الاول كانو بيزنو و بيحاولو و بيحاولو و بيحاولو.. بس لما لقو ان القاعدة مش بتتكسر.. اقتنعو اني جادة..
خاصة اني سايبة مجال للاستثناء و مجال منطقي..
و هو اننا اصلا في الاجازة بنتأخر عن معاد نومنا شوية فمسموح.
و بابانا كمان التزم بالكلام دا بعد جهد جهيد.. و احنا ملتزمين بهذه القواعد يعني ما ينفعش اكل حاجة مسكرة بالليل عشان انا قدوة..
و لما انا او بابا بنخالف.. بنتعاقب.. سواء بغرامة مالية.. او وقفة في النوتي كورنر.. و اه انا باقف في النوتي كورنر.. و اخواتي و صاحباتي كمان..عشان القواعد مش بنخالفها
طب هل مريم و علي مش بيزنو؟
لا طبعا في حاجات بيزنو عليها.. و خاصة ان مريم في سن الزن و النكد.. و علي بدأ في مرحلة انا باسميها (غلاسة ما قبل المراهقة) بس القواعد دي بتساعد ان كمية الزن تقل.. و كمية الجدال و النقاش تقل و كل حاجة اقدر اعمل لها قاعدة باعمل و باتفق عليها و بنطبقها..
🌟هل انا انسانة فولاذية ما بتنرفزش، لا والله بس انا باحاول و باجاهد اني افرغ دا في اي حاجة تانية.. غسيل مواعين، مشي شوية، تنطيط ما يضرش.. اهو اي حاجة ما اخليش ضغط الحياة يسحق اولادي.. مهو انا ماعنديش اغلى منهم..
الموضوع مش سهل.. بس مش صعب والله.. بس عايزنا نطلع من دايرة اللطم المستمرة، و الشعور بإني ضحية و يا عيني و يا حرام.. لدايرة انا قوية و قادرة.. عشان خاطر ولادي..
عشان خاطر نفسي..😌
و عشان خاطر ربنا ايها الاب الكريم.. لتقل خيرا او لتصمت..
يعني هاتساعد في تطبيق القوانين.. ساعد مش هاتساعد.. قولهم جملة واحدة دي قاعدة يا حبايبي..
لكن ما تبقاش الام ممشية الدنيا طول اليوم و انت تيجي بكلمة تلخبط الدنيا وتهدم ما بنته..
و بعدين دا في الاول و في الاخر عشان مصلحة الولاد.. بلاش مصلحتهم خلينا نتكلم في انت عايزهم ولاد يشرفوك يبقى اشتغل عليهم و ابذل مجهود.
مهي زرع.. حصد..
ازرعو تربية تحصلوا على ابناء رائعين.. و بين الزراعة و الحصاد.. في صبر و مراعية و تحمل مشقة.. ربنا يهدينا لولادنا ويهدي ولادنا لينا....